DUMILA E DECI

Cu ci arriva si fa la cruci

C’è la guerra e nun c’è paci

Gesù Cristu resta ncruci

E cu grida e cu fa vuci

Oggi nuddru c’è filici

------------O------------

1°

Duemila e deci vitti prisintari

Ca sciarpa misa chinu di duluri

Darrè la porta ntisi stranutari

Era accrappatu cu lu rafridduri

I vinni apposta pi m’alliticari

Ca lu duemila e novi a fari iri

E va circannu pi si sciarriari

Mancu rispettu cchiù vonnu purtari

2°

Duemila e deci voli cumannari

S’ha prisintatu cu lu rafridduri

E vidimu chi st’annu c’ava a fari

Si ni fa stari comu i prigiuneri

Vinni cu la pritesa a liticari

Ca l’annu vecchiu l’ava a fari iri

Comu cchiu ranni voli cumannari

Si veni l’antru a tia fa scappari

3°

S’aprisentatu cu lu so putiri

Co populu sutta d’iddru ava a ristari

Si veni l’antra ca è superiori

Veru li scarpi ti li fa lassari

E t’assicuta cu lu rifridduri

Cerca rifugiu unni t’ha ammucciari

E nun t’aspettu cchiù c’ava viniri

Darrè la porta ti fazzu ristari

4°

Si st’annu restu cu lu rafridduri

Comu mi sona me iri ammucciari

S’a prisintatu chinu di duluri

Ca fina a mia fici stranutari

U nu salutu cchiù ca va binari

Mancu si sentu forti tuppiari

Veru ca nun sacciu cuntinuari

A l’antru munnu i vurria a finiri

5°

Lu me distino ancora nun si po’ diri

Si cchiù luntanu ci pozzu arrivari

Cu chisti cosi chi si sentinu diri

La menti nun mi voli assirinari

Ma pregu sempri a lu nostru Signuri

Chi grazia e saluti n’avi a dari

Spiramu ca la guerra va a finiri

Ognunu parti pi lu so quartieri

6°

Ora l’annu novu ama spittari

O tintu o bonu ni l’amu a pigliari

Spiramu ca porta beni l’abbiniri

Duemila e deci l’ama a fistiggiari

Tutta la notti ni tocca aspittari

Cu corpi d’artifici a sparari

Speru ca tutti n’ava a cuntintari

Duemila e deci farà lu so duviri

7°

I pregu pi la famiglia e li parenti

D’aviri la saluti tutti quanti

Ci criu ca m’ascuntanu li santi

Lu nomu di Gesù Cristu l’aiu nmenti

Lu pregu sempri di iornu e di notti

Mi fa pinsari passatu e prisenti

E l’occhi me su sempri viglianti

Chiddru  chi scrivu è sinceramente.

Maria Sacco

raccolta:" PUISIA DI LI PATRI E LI FIGLI"